Roli i portierit mbetet një pikë delikate për Bayern Munich edhe këtë fillim të sezonit. Manuel Neuer është ende në fazën e rikuperimit ndërsa nga skuadra u largua Yann Sommer që preferoi një aventurë te Inter në Serie A.
Aktualisht, numri një i bavarezëve është Sven Ulreich, megjithatë trajneri Thomas Tuchel ka nevojë për alternativa në pritje të rikthimit të Neuer. Ndaj, drejtuesit kanë gjetur akordin me një portier që mbërrin nga Izraeli. Fjala është për Daniel Peretz që së fundmi ishte pjesë e Maccabi Tel Aviv, teksa Bayern do të paguajë pesë milionë euro plus bonuse për shërbimet e 23-vjeçarit.
Lexo edhe:
- VIDEO/ Gjashtë muaj pa skuadër, sulmuesi i kombëtares prezantohet në Turqi
- “Maignan është lider si Ibra”, Pioli: Po lind një Milan i bukur, krenar që jam trajneri i Giroud
- Telenovela Mbappe nuk mbaruar, Real Madrid bëhet gati për “serinë” e fundit!
- Legjenda argjentinase rikthehet në rolin e trajnerit, pranon detyrën e vështirë dhe me rrogë minimale
Peretz pritet të luajë edhe një ndeshje të fundit me Maccabin para se të fluturojë në fundjavë për në Munich aty ku do të kryejë vizitat mjekësore për t’u zyrtarizuar më pas si një lojtar i Bayernit. Palët kanë një marrëveshje për një kontratë pesëvjeçare me Peretz që do të firmosë deri në vitin 2028.
Kështu, 23-vjeçari dhe Ulreich do të luftojnë për statusin e titullarit, të paktën deri kur të rikthehet Manuel Neuer i cili pritet të vendoset sërish mes shtyllave, edhe për t’i “dhënë një dorë” para Europianit të verës së ardhshme, me eventin që zhvillohet pikërisht në Gjermani.
