Europa League ul siparin me finalen e madhe mes Villarealit dhe Manchester United, në “Stadion Miejski” të Gdanskut në Poloni, teksa ruleta e penalltive u buzëqeshi spanjollëve të Unai Emery.
Ky i fundit konfirmohet si mjeshtër i Europa Leagues, pasi ka shkuar 5 herë në finale, duje triumfuar plot 4 herë, tre herë radhazi me Sevillan dhe tani me Villarealin, që fiton për herë të parë një kompeticion europian.
Pjesa e parë ishte me një ritëm të lartë, por pak kërcënime serioze në portat përkatëse, teksa Villareali gjeti golin e avantazhit në minutën e 29′, kur Moreno shtyu në rrjetë një top të dërguar në zonë nga ana e Dani Parejos.
Pjesa e dytë nisi me pretendimin për 1q-metërsh nga ana e “djajve të kuq”, por arbitri francez Clement Turpin vendosi për të kundërtën pasi u konsultua me sallën e VAR-it.
Në minutën e 55-të ishte veterani uruguaian Edinson Cavani, që u lirua në zonë dhe shënoi golin e barazimit, teksa arbitri e konfirmoi një minutë më vonë pas rishikimit të aksionit në VAR, pasi dyshohej për një pozicion jashtë loje.
Cavani i shkoi pranë edhe golit të dytë në minutën e 72-të, por topi i goditur prej tij me kokë, u largua mbi vijën fatale nga një mbrojtës i spanjollëve, ndërsa koha e rregullt përfundoi në barazim, duke bërë që skuadray t’i drejtoheshin shtesës 30-minutëshe.
Asgjë për t’u shënuar edhe gjatë kësaj kohe, përveç një pretendimi për penallti nga ana e Villarealit, por edhe këtë herë Turpin mori vendimin e duhur me ndihmën e pamjeve të servirura nga VAR.
Për të përcaktuar fituesin, u desh ekzekutimi i 11-metërshave, teksa nga pika e bardhë patën mundësi të godasin të 22 futbollistët që ishin në fushë në përfundim të ndeshjes.
Pas plot 20 penalltish të sakta radhazi, finalja u vendos nga sfida direkte mea portierëve, teksa Rulli i Villarealit mposhti De Gean nga pika e bardhë dhe më pas i kuptoi krahub për t’i pritur 11-metërshin dhe për të marrë trofeun në Spanjë.
“Nëndetësja e verdhë” mbyll kështu në mënyrën më të mirë sezonin, pasi triumfon në Europa League dhe njëkohësisht siguron një biletë për edicionin e ardhshëm të Ligës së Kampionëve.