Paul Pogba nuk luan një ndeshje zyrtare prej muajit prill të vitit 2022 teksa vuan një dëmtim në gju, që e detyroi edhe t’i nënshtrohej ndërhyrjes kirurgjikale. Në këtë formë, debutimi i tij i dytë me fanellën e Juventus vijon të vonojë edhe pse pritej që mesfushori të ishte i gatshëm në fillimin e muajit shkurt.
Vetë trajneri Massimiliano Allegri theksoi se nuk ka një datë rikthimi për Pogba, ndërsa ajo që lë për të dëshiruar është sjellja e lojtarit jashtë fushe. Së fundmi, kritikat për Pogba vijnë nga një legjendë e Juventus siç është Marco Tardelli. 68-vjeçari theksoi se francezi nuk mund të shkojë për ski ndërkohë që shokët e tij në fushë vuajnë.
“Pogba nuk luan prej prillit të vitit 2022 dhe tashmë është kthyer në një problem për Juventusin. Nuk e dimë kur do të rikthehet dhe nuk e dimë se çfarë do të bëjë në fushë. Pogba ikën dhe shkon për ski ndërkohë që shokët e skuadrës vuajnë në fushë, është një problem që bardhezinjtë duhet ta zgjidhin. Nuk më duket normale që të kesh një lojtar të tillë dhe ta paguash, sjellja e Pogba ndaj shokëve nuk është e drejtë dhe kjo mua më shqetëson”, u shpreh Tardelli.
