Kategoria Superiore mbylli fazën e parë teksa nga statistikat e regjistruara në 45 ndeshjet e para të sezonit rezulton se janë shënuar 83 gola me një mestare prej 1.84 për ndeshje. Sakaq, bie në sy fakti se tashmë në Superiore duket se është zbutur miti i “fushës” dhe statistikat zbulojnë se janë regjistruar më shumë fitore për skuadrat udhëtuese.
Kështu, 14 janë sukseset për ekipet vendase, 13 ndeshje janë mbyllur në barazim dhe 18 fitore kanë shkuar në favor të skuadrave udhëtuese. Ndërkohë, gjatë fazës së parë në Superiore, kartoni i verdhë është përdorur në 202 raste, me një mesatare ndëshkimi prej 4.4 për ndeshje. Nga ana tjetër, kartoni i kuq është përdorur vetëm në pesë raste pasi vetëm Tirana dy herë, Kukësi dy herë dhe Vllaznia një herë, janë penalizuar me masën ekstreme.
Nga ana tjetër, në këtë fazë të parë, VAR ka ndërhyrë në 13 raste ndërkohë që janë akorduar në total 10 penallti nga të cilat tetë kanë përfunduar me gol. Sa i përket golave nga goditjet standarte, në këtë mënyrë janë shënuar gjithsej 23 gola.
