Skënderbeu arriti të triumfojë sërish, këtë herë me rezultatin 2-1 kundër Tiranës, duke u ngjitur në kuotën e 20 pikëve dhe duke rikthyer krizën e rezultateve te bardheblutë e kryeqytetit.
Në një nga sfidat më të rëndësishme të javës, interesi i tifozëve në shkallët e stadiumit nuk ishte në nivelet e pritshmërive, por loja në fushë ishte vërtetë interesante dhe e luftuar.
Korçarët arritën të zhbllokojnë sfidën që në minutën e 18’ me anë të sulmuesit kryesor të tyre, Blerim Krasniqi, gol ky që zgjoi Tiranën, me bardheblutë që u bënë më kërkues, por pa arritur të vënë në vështirësi serioze Koliçin.
Ky i fundit bëri disa pritje interesante, ndërsa shokët e tij të skuadrës tentuan të vënë në vështirësi kryeqytetasit me anë të kundërsulmit dhe pikërisht në një të tillë gjetën edhe golin e dytë me Ndecky në minutën e fundit të kohës së rregullt.
Ishte një zbritje e shpejtë e Otto John, që hyri në zonë dhe shërbeu saktë për Ndecky, që gjuajti menjëherë dhe topi u përplas në traversë e ra brenda kuadratit të Likës, ndonëse më pas i rikthye sërish në duart e këtij të fundit.
Në minutën e tretë shtesë, bardheblutë arritën të shënojnë golin e nderit me anë të fantazistit shkodran Edon Hasani, por koha e mbetur nuk mjaftoi që djemtë e drejtuar nga Julian Ahmataj të shmangin humbjen.
Kjo ishte fitorja e dytë radhazi për Skënderbeun, që u ngjit në kuotën e 20 pikëve, ndërsa Tirana nuk fiton prej 3 javësh dhe mbetet në kuotën e 19 pikëve, 3 pikë më pak se Partizani kryesues, që do të luajë të hënën me Laçin.
Abazaj e Rroca nderojnë Kukësin, Luftëtari humb dy pikë në fund
