Humbja me Tiranën duket se ka komplikuar totalisht ecurinë e Laçit, që për të tretën ndeshje radhazi nuk shkon dot përtej barazimit, ndonëse kalendari u ka rezervuar skuadra të fundit të tabelës së renditjes.
Pas barazimeve ndaj Egnatias dhe Kastriotit, sot ka qenë radha e Skënderbeut të vendit të fundit që të marrë një pikë në Kurbin, në ditën që trajneri Skënder Gega debutoi në stolin e korçarëve, ku mori vendin e Migen Memellit.
Kurbinasit ishin më të qartë në lojën e tyre, por jo në konkretizim, pasi Adeleke humbi disa raste shënimi, ndërsa korçarët bënë ndeshjen e tyre tipike, duke u mbrojtur me shumë forca dhe kundërsulmuar rrezikshëm.
Në minutën e 68’, ishte mbrojtësi Velkoski që komplikoi ndeshjen për Laçin, pasi u ndëshkua me karton të kuq, megjithatë skuadra e Josës kërkoi deri në fund golin dhe e gjeti në shtesë, por gjithçka u anulua me ndërhyrjen e sistemit VAR, që evidentoi një pozicion jashtë loje të Guindo.
Ky barazim lë Laçin në vendin e dytë, por tashmë 10 pikë larg Tiranës kryesuese dhe thuajse tërësisht jashtë garës për titull, ndërsa Skënderbeu merr një pikë shprese, por mbetet në vendin e fundit.
[jsStandings id =”271871″ columns =”played_chk;point_chk;emblem_chk”]
Abissnet Superiore
Java e 25
Laçi-Skënderbeu 0-0
Kronika e ndeshjes:
– Mbyllet pa fitues sfida në Kurbin…
92’ – Ukja provon nga distanca, grushton Rexhepi, por topi shkon në këmbët e Guindou, që nuk e ka të vështirë ta dërgojë në rrjetë. Kurbinasit festojnë gjatë, por ndërhyn VAR-i, që evidenton një pozicion jashtë loje të sulmuesit dhe goli nuk vlen.
89’ – Dajan Shehi kthen keq një top drejt Rexhepit, por gardiani i korçarëve del shpejt dhe i heq mundësinë e shënimit, sulmuesi Zylfiu. Pretendojnë për penallti kurbinasit, por nuk mendon kështu arbitri Kreshnik Bajrami.
87’ – Ujka hyn mirë në zonë dhe lëshon një goditje të fortë me të majtën, por grushton Rexhepi, ndërsa më pas Dajan Shehi largon rrezikun, duke dërguar topin në këndore.
82’ – Mazrekaj dërgon një krosim të rrezikshëm nga këndi, duke gjetur Turkajn, që provoi goditjen, por Sadriu largon mbi vijën fatale, duke shpëtuar portën e korçarëve.
76’ – Tjetër kombinim i mirë i kurbinasve, me Guindo që provon goditjen, por gjuan dobët dhe topi zotërohet nga portieri Rexhepi.
72’ – Ka tension në tribuna mes tifozëve kurbinas dhe Vangjel Zguros. Ndërpritet ndeshja, teksa trajneri i Skënderbeut, Skënder Gega ndërhyn për të larguar Zguron dhe qetësuar gjakrat.
69’ – Ekzekutohet goditja e dënimit, me topin që gjen Berishën në zonë, i cili godet menjëherë, por reagon po kaq mirë Dajsinani, duke grushtuar në këndore. Nga krosimi i ardhur nga këndi, provon sërish Berisha, por këtë herë nuk gjen portën
68’ – Velkoski humb Mensah dhe e ndal më pas me faull. Arbitri bajrami akordon karton të verdhë, por e korrigjon pasi rishikon aksionin në VAR. Velkoski është lojtari i fundit dhe ndëshkohet me karton të kuq. Laçi me 10 futbollistë.
63’ – Shkarkon të majtën edhe Ziko, që lëshon një “silurë” të rrezikshme, por topi kalon ngjitur me shtyllën.
62’ – Ujka provon nga brenda zonës, por goditja është e lehtë dhe shkon në duart e Rexhepit pa probleme.
51’ – Ziko provon një krosim, por koordinohet keq dhe topi shkon jashtë, duke u përplasur fillimisht mbi traversën e Rexhepit, që shoqëron sferën për siguri.
46’ – Laçi e nis menjëherë në sulm, me një vertikalizim për Adeleke, por sulmuesi gjuan shumë dobët dhe nuk kërcënon portën e korçarëve.
– Mbyllet pjesa e parë në barazim pa gola, me Laçin më kërkues dhe Skënderbeun, që u mbrojt mirë dhe provoi në kundërsulm, por pa rezultat.
42’ – Mazrekaj ekzekuton një goditje dënimi, duke hedhur një krosim të saktë për Shehun në zonë, por goditja me kokë e mesfushorit përfundon jashtë kuadratit të portës së Rexhepit.
17’ – Aksion mjaft i bukur i kurbinasve, me Adeleken që nuk koordinohet mirë dhe dërgon topin jashtë kuadratit.
11′ Goditje dënimi për vendasit. Gjuajtje potente e Ujkës, grushton portieri Rexhepi.
3′ Laçi jep sinjalin e parë. Aksion i gjatë i bardhezinjve, tenton Mazrekaj nga e majta, pret Rexhepi.
FORMACIONET ZYRTARE
LAÇI (4-3-3): Dajsinani; Roganovic, Malota, Velkoski, Ziko; Spahiu, Shehu, Ujka; Adeleke, Guindo, Mazrekaj. Trajner: Mirel Josa.
SKËNDERBEU (3-5-2): Rexhepi; Vitija, Shehi, Sadriu; Frashëri, Dwumfour, Mara, Jean Victor, Zguro; Berisha, Mensah. Trajner: Skënder Gega.
[quiz-cat id=”297576″]
