Trajneri i Lirisë së Prizrenit, Bledi Shkëmbi, ka befasuar me deklaratën e tij pas fitores me Feronikelin. Ai zbuloi se ka dhënë dorëheqjen para dy ditëve për shkak të problemeve me drejtuesit, por premtoi se do t’u qëndrojë pranë futbollistëve deri në momentin që do ta shkarkojnë.
“Që në momentin që është larguar kryetari Mirsat Çollaku, të themi të vërtetën ne kemi patur shumë probleme, por që jemi munduar t’i mbajmë të fshehta. Problemet kanë qenë të natyrës financiare e para, por edhe disa mosmenaxhime të mira nga presidenti i ri që ka ardhur, por edhe nga drejtori i klubit. Unë dhe lojtarët kemi qenë veç, disa anëtarë të kryesisë bashkë me drejtorin veç.
Kanë punuar ndoshta me dashje apo padashje kundër ekipit dhe këto fjalë dua t’i lidh me ndeshjen sot, që këta futbollistë u treguan këtyre njerëzve që futbolli nuk ka pasaportë, shqiptare apo kosovare, futbolli ka vetëm futbvollistë të mirë që stërviten mirë, ka profesionalizëm. Futbolli nuk ka që do kryetari dy futbollistë do të paguhen dhe 3 nuk do të paguhen, futbolli nuk ka nga këto.
Unë kam dy ditë që e kam dhënë dorëheqjen, por për hir të futbollistëve kam ndenjur t’i respektoj dhe për hir të tyre do të jem deri në momentin e fundit, nëse kryesia do të të më lërë të punoj, në të kundërt të dalë kryesia të më shkarkojë”.
Liria pas 21 javësh në kampionat, ndodhet në vendin e katërt me vetëm 3 pikë më pak se skuadra kryesuese e Dritës.
