Shpresojnë për një fillim të ri pas pauzës në Vlorë, me 8 javët e para që janë shënjuar nga shumë oshilacione dhe disa rezultate zhgënjyese për Flamurtarin, me Ilir Dajën që shpesh ia ka faturuar ngërçit psikologjik të krijuar në skuadër. Ditët e Kombëtareve shpresohet të kenë sjellë një ndryshim edhe në këtë aspekt, me misionin që rinis nga një sfidë e vështirë me Tiranën.
Pavarësisht problemeve kryeqytetasit kanë një organikë për t’u vlerësuar, dhe bashkë me ta shkon në Vlorë tani si kundërshtar Ardian Mema, me avantazhin e njohjes në brendësi të pikave të forta por edhe të dobëta në skuadrën kuqezi. Një ndër to ka rezultuar në këto javë të para sulmi, në 8 javë kampionat Flamurtari ka shënuar 8 herë, por gjysma e këtyre golave janë shënuar në sfidën me Kastriotin, dhe dy të tjerë në barazimin me Kamzën, ku gjeti rrjetën edhe Tomislav Bushiç.
Flamurtari nuk ka shënuar asnjë gol në 4 ndeshje, respektivisht ndaj Teutës, Skënderbeut, Partizanit dhe Laçit, dhe gjetja e golit në vazhdimësi nga sulmuesit është një element i domosdoshëm për të pasur një sezon të suksesshëm. Tomislav Bushiç është në kuotën e tre finalizimeve, por ndërkohë Danilo Alvesh ende nuk ka shënuar golin e parë në këtë kampionat e po ashtu dhe Andi Ribaj që duhet theksuar se ka pasur dhe më pak hapësira duke qenë se ka regjistruar vetëm dy prezenca.
Natyrisht që shënimi i golave është i lidhur ngushtë dhe me furnizimin e sulmit dhe perfeksionimin e mekanizmave të lojës që Ilir Daja dëshiron të aplikojë, ditët e pauzës duhet të kenë shërbyer shumë edhe në këtë drejtim, gjithçka për ta rinisur me një fitore përballë Tiranës.
