Milani vuan por në fund merr një fitore të pastër dhe shumë të rëndësishme që e ngjit sërish në zonën Champions. Kuqezinjtë triumfuan me shifrat 0-2 në transfertën e Marassit ndaj Genoas në një sfidë ku kishin shumë mungesa për shkak dëmtimi dhe skualifikimi. Megjithatë falë golave të Borinit dhe Susos në 20 minutat e fundit të sfidës skuadra e Gatussos u ngjit sërish në vendin e 4-t të Serie A në kuotën e 34 pikëve, 6 më pak se Interi i vendit të tretë dhe 1 më shumë se Roma e vendit të 5-të. Ishte një Milan pragmatist por që mori maksimumin në një sfidë të vështirë të cilën Genoa e nisi më mirë por vuajti mungesën e sulmuesit kryesor Piatek i cili është një hap larg transferimit te Milani. Në minutën e 72-të, Borini i shërbyer në mënyrë perfekte nga Conti (i cili pak nga pak po rifiton formën më të mirë pas atij dëmtimi të gjatë), realizoi një gol të thjeshtë për ti dhënë avantazhin Milanit. Në të 83-ën skuadra e Prandellit pësoi edhe golin e dytë dhe atë të kapitullimit i cili mban firmën e Susos pas asistit të Cutrones.
