Ëndrra Champions mund të marrë fund për Partizanin në volejboll për femra. Vajzat e kuqe u mposhtën pastër 3-0 nga hungarezët e Vasas në ndeshjen e parë të fazës play-off raund që nëse Partizani do ta kalojë me sukses do ta çojë në fazën e grupeve të Champions Leagues së femrave. Një disfatë e rëndë që pakëson shanset e trajnerit turk Sancak për të vazhduar aventurën europiane në Champions pasi tashmë pas kësaj humbjeje të thellë në Budapest, Partizanit i duhet të fitojë 3-0 me sete në ndeshjen e kthimit në kryeqytet të mërkurën e ardhshme për ta çuar ndeshjen minimalisht në shtesë ose siç quhet ndryshe golden set. Partizani nuk bëri një ndeshje të keqe por niveli i skuadrës së Vasas ishte më i lartë. Seti i parë foli për skuadrën hungareze që e kryesoi që në fillim dhe triumfoi me shifrat 25-19. Me rezultatin 25-20 u mbyll seti i dytë, edhe pse Partizani e nisi mirë dhe arriti të kryesonte deri në 4-8 por hungarezet më pas treguan forcën e tyre ashtu siç bënë edhe në setin e tretë të cilin e fituan lehtësisht 25-16 dhe gjithë ndeshjen 3-0.
