Sulmuesi i Përfaqësueses së Kosovës, Lirim Kastrati ishte protagonist për Lokomotivën e Zagrebit, pasi shënoi dy herë në fitoren e kësaj të fundit 2-1 përballë Rijekës në shtëpi.
Anësori 21-vjeçar i “Dardanëve” mori një top të gjatë nga Myrto Uzuni dhe lëshoi një sprint fantastik, për të arritur i vetëm para portierit, ku e pati të lehtë të shënojë golin e avantazhit në fund të pjesës së parë.
Edhe në minutën e 71-të u përsërit e njëjta skemë, teksa edhe këtë herë Kastrati fitoi duelin e shpejtësisë me kundërshtarët, dribloi portierin dhe shënoi golin e dytë për vendasit, ndërsa Rijeka shënoi golin e vetëm me Loncar në minutën e 86’.
Kastrati qëndroi në fushë deri në minutën e 92-të dhe më pas u zëvendësua për të shijuar duartrokitjet e publikut, ndërsa gjatë gjithë kohës në fushë qëndruan edhe Myrto Uzuni e Jon Mersinaj.