Donald Mëllugja, një nga më të mirët e Bylisit në barazimin me Skënderbeun, që vlejti kualifikimin në gjysmëfinalen e Kupës, u tregua I sinqertë kur iu kërkua mendimi për disa raste të diskutueshme, por theksoi se vendimi i Jorgjit për të anuluar penalltinë, ishte i papranueshëm.
Rasti i penalltisë: Nëse arbitri e dha penallti dhe e anulon për punë sekondash, unë jam dakord. Por nëse e anulon pas 6-7 minutash pasi ndikohet nga të tjerë, është e papranueshme. Të them të drejtën, unë godita takën. Mbrojtësi shkoi më parë te topi dhe nuk jam 100% nëse ishte penallti. Në rastin e golit tonë, edhe mund të jepej goditje dënimi, pasi unë ngrita takën.
Çelësi i suksesit: Ne kemi forcën e grupit, jemi të gjithë të rinj dhe duam të biem në sy. Na është ngushtuar rrethi. Edhe sot nuk ishim në formën tonë më të mirë. Megjithatë mendoj se kemi bërë shumë mirë dhe do tentojmë Kupën, pasi në kampionat kemi bërë disa hapa të gabuar. Skënderbeu është një skuadër shumë e mirë, por heroi ynë sot ishte Miraka, që na shpëtoi në disa raste.