Prishtina dhe Ballkani i shfaqin që në start ambiciet në Superligën e Kosovës. Kryeqytetasit, të drejtuar nga Zekerija Ramadani, mposhtën thellë 3-0 Drenicën në “Fadil Vokrri”, sfidë ku debutuan edhe dy afrimet e rëndësishme të verës, Gledi Mici dhe Sabien Lilaj, ndërsa ekipi i Ismet Munishit iu impoua 4-1 Besës së Pejës.
Sfida e zhvilluar në kryeqytet mes Prishtinës dhe Drenicës u zhbllokua në minutën e 32-të, kur një krosim i Gledi Micit u devijua për në rrjetë nga Bekteshi. Në pjesën e dytë për bardhekaltrit realizuan gjithashtu Krasniqi dhe Otto John.
Në Suharekë, spikati me tregolësh Mirlind Daku, ndërsa të parin për Ballkanin e realizoi Krasniqi. Goli i nderit për Besën (4-1) mban firmën e Gentrit Salihut në minutën e fundit të kohës së rregullt.
