Roma e ka gjetur më në fund zëvendësuesin e Edin Dzekos dhe bëhet fjalë për sulmuesin e talentuar spanjoll Borja Mayoral. Klubi verdhekuq ka arritur marrëveshjen me Realin e Madridit dhe pritet që në 48 orët e ardhshme sulmuesi të mbërrijë në kryeqytetin italian.
Bëhet fjalë për një huazim për shifrën e 2 milionë eurove, me Romën që ka ruajtur të drejtën e blerjes verën e ardhshme për 10 milionë euro të tjera, çka do ta çonte vlerën e kartonit në 12 milionë euro në total.
Tani pritet që Broja Mayoral të rinovojë kontratën me Realin e Madridit, pasi aktualja i skadon verën e ardhshme dhe “Los Blancos” nuk mund ta japin në huazim pa ia zgjatur më parë bashkëpunimin.
Sulmuesi 23-vjeçar spanjoll është rritur te Reali i Madridit, por ka pasur shumë pak hapësira me fanellën e “Los Blancos”, ndërsa në dy sezonet e fundit ka qenë në huazim te skuadra e Levantes.
Mayoral është një sulmues shtatlartë, që di të luajë si në qendër të repartit, ashtu edhe në krah, çka e bën atë pak ndryshe nga Dzeko dhe i jep trajnerit Paulo Fonseca edhe alternativa të tjera loje.