Cavani gati të rinovojë me Man. United
Sulmuesi 34-vjeçar uruguaian Edinson Cavani duket i lumtur në Manchester dhe u ka bërë të ditur drejtuesve të “djajve të kuq” se është gati të rinovojë kontratën e tij, duke qenë se aktualja skadon në fund të këtij sezoni. Cavani iu bashkua “djajve të kuq” në tetor të vitit të kaluar dhe deri tani numëron 24 ndeshje të luajtura e 7 gola të shënuar, ndonëse në shumicën e rasteve ka ardhur nga pankina. Nga ana tjetër edhe Solskjaer është mjaft i kënaqur me performancën e uruguaianit dhe e sheh si lojtarin e duhur për t’i shtuar eksperiencën ekipit.
PSG e kënaqur me Florenzin, gati të blejë kartonin nga Roma
Paraqitjet e Alessandro Florenzi duket se kanë bindur drejtuesit e klubit të Paris Saint Germain të ushtrojnë të drejtën e blerjes së kartonit të futbollistit, i cili aktualisht është i huazuar nga klubi i Romës. 29-vjeçari, i cili është kthyer në një lojtar të rëndësishëm për mbrojtjen e parizienëve duke e ndihmuar skuadrën edhe në sulm, pasi në 16 aktivizime ka realizuar edhe dy gola, duket se do ta vazhdojë karrierën në Ligue 1. Klubi i presidentit Al-Khelaifi do t’i paguajë Romës shumën e 8 milionë Eurove për ta blerë përfundimisht kartonin e mbrojtësit.
E ardhmja e Coman larg Bayern, kërkohet nga Man. United
Pas David Alaba, i cili zyrtarizoi largimin nga Bayern Munich në fund të sezonit, klubi bavarez rrezikon të humbasë një tjetër yll. Kingsley Coman, kontrata e të cilit skadon në fund të qershorit të vitit 2023 ka përfunduar në radarët e Manchester United. Sipas mediave gjermane, “djajtë e kuq” për të joshur sulmuesin francez të transferohet në “Old Trafford” i kanë ofruar një page që kap shifrën e 15 milionë Eurove në sezon. 24-vjeçari, i cili është pjesë e klubit bavarez që nga viti 2017 kohë kur u transferua nga Juventusi, aktualisht paguhet 10 milionë euro nga klubi gjerman.
