Vllaznia zhvilloi një ndeshje të mirë taktike kundër Laçit, këtë e theksoi edhe trajneri Brdaric në “Gol pas Goli”, por ajo që i mungoi skuadrës shkodrane ishte efikasiteti i dobët në finalizim.
“Dua të komplimentoj lojtarët për lojën e mirë në aspektin taktik. Nuk ishte një ndeshje e lehtë. Duhet të dilnim në kundërsulme dhe patëm shumë raste. Ky është një moment ku nuk po arrijmë të shënojmë. Duhet të punojmë për këtë pjesë. Cisse u mundua të bënte diçka mes linjave, por skuadra ishte në mbrojtje dhe ishte vetëm në disa raste. Duhet të punojmë për të përmirësuar pjesën sulmuese”.
Moduli: “Menduam se Laçi do të luante si zakonisht, me 3-5-2. Ata kishin ndryshuar dhe ne luajtëm në mbrojtje, me idenë për të krijuar më pas shanse nga rastet që do të paraqiste ndeshja. Krijuam mundësi, kishim ekuilibër, por në finalizim kemi vuajtur”.
Sërish përballë Laçit në Kupë: “Kemi bërë sezon të mirë, kampionati është i vështirë. Duhet të kemi shumë besim te vetvetja. Patëm një moment jo të mirë, por më pas u kthyem. Skuadrat nisën të na njohin dhe dinin me kë përballeshin. Na ka munguar finalizimi dhe besimi në disa raste. Duhet të shënojmë në Kupë, të jemi më të zgjuar, të shfrytëzojmë rastet tona. Jemi gati dhe do të jemi të përgatitur për t’u përballur me Laçin në gjysmëfinale”.
