Antonio Rudiger vijon të marrë vëmendje. Mbrojtësit gjerman i skadon kontrata në verë me Chelsea-n dhe palët që ende nuk kanë gjetur gjuhën e përbashkët për rinovimin, ndikuar edhe nga kriza që ka pushtuar klubin londinez pas sanksioneve të presidentit rus, Roman Abrahmovich.
Një situatë nga e cila shumë klube duan të përfitojnë, duke nisur nga Barcelona, Bayern Munich dhe Real Madrid, por së fundmi në skenë është shfaqur edhe Juventusi. Drejtuesit e “Zonjës së Vjetër” po punojnë për të rikthyer në kampionatin italian, mbrojtësin i cili më parë ka luajtur për Romën.
Klubi italian i ka ofruar për momentin një pagë 6.5 milionë euro, por oferta e Juventusit është shumë larg nga kërkesa e mbrojtësit, i cili kërkon të paktën 10 milionë euro në sezon. Një shifër shumë e lartë, por drejtuesit “bardhezinj” do të provojnë deri në fund të bindin lojtarin që të pranojë ofertën e tyre dhe më kryesorja të ul pretendimet e tij.
Së fundmi, objektivi Rudiger po zbehet dita-ditës te Bayern dhe Real Madrid që pothuajse janë jashtë garës për shërbimet e gjermanit, ndërkohë, Barcelona nuk ul aspak pretendimet. Katalanasit ishin të parët që u vendosën në gjurmët e mbrojtësit, por tani me hyrjen e Juventusit, pritet të jetë një garë e fortë. Një avantazh i lehtë për “blaugranat” është se, drejtuesit katalanas kanë nisur bisedimet dhe mes tyre dhe agjentit të lojtarit ka pasur kontakte, ndaj mund të konsiderohet një hap përpara kundërshtarëve.
29-vjeçari është një nga lojtarët më të spikatur te Chelsea, madje në këtë sezon ka shënuar 2 gola në 26 prezenca në Premier League dhe e ardhmja e tij pritet me shumë interes.
