Te Juventusi presin një përgjigje përfundimtare, të cilën Angel Di Maria duket se ka zgjedhur ta japë nëpërmjet rrjeteve sociale. Ylli argjentinas, që është pa kontratë, vijon pushimet në brigjet e Spanjës, por duket se tashëm e ka ndarë mendjen që t’i bashkohet Juventusit sezonin e ardhshëm.
Një foto me shokët e tij Paredes e Lo Celso, e postuar bardhezi, duket se është një sinjal i qartë për të ardhmen e argjentinasit, që pasi ka luajtur në Spanjë, Francë e Angli, stacionin e radhës do ta ketë pikërisht në Serinë A.
Juventusi ka nisur prej kohësh negociatat me Di Marian dhe duket se e ka marrë tashmë përgjigjen pozitive, por pritet vetëm që argjentinasi të përfundojë pushimet, para se të udhëtojë drejt Torinos për të kryer vizitat mjekësore dhe firmosur kontratën.
