Merr fund aventura europiane e Gjilanit, që është mposhtur me rezultatin 3-1 në Letoni nga Liepaja. Skuadra e drejtuar nga Zekerija Ramadani, udhëtoi drejt Letonisë me avantazhin e fitores 1-0 në ndeshjen e parë, të cilin nuk arriti ta ruajë dot.
Pas një pjese të parë pa gola, vendasit fituan një penallti në të 49-ën, të cilën e shndërroi në gol Karasauskas. Megjithatë reagimi i Gjilanit ishte perfekt dhe dy minuta më vonë Krasniqi riktheu baraspeshën, pas një aksioni model, ku finalizoi saktë para portës.
Gjërat u komplikuan sërish për gjilanasit në minutën e 64-t, kur vendasit gjetën golin e avantazhit me anë të Belakovic dhe më pas shtuan presionin, në kërkim të kualifikimit brenda kohës së rregullt.
Në minutën e 87’, ishte kapiteni Besar Musolli që shkaktoi faull në zonë dhe u dhuroi vendasve penalltinë e dytë, të cilën e mori përsipër dhe e shënoi Dodo, duke vulosur fitoren 3-1 të Liepajës dhe kualifikimin për në turin e dytë.
Vlen të theksohet se për letonët e Liepajës luan edhe ish mesfushori i Laçit, Ardit Deliu, i cili ashtu si një javë më parë në Prishtinë, edhe këtë herë ndoqi ndeshjen nga pankina, duke mos u aktivizuar për asnjë moment.
