Barcelona ia ka dalë të regjistrojë katër nga pesë afrimet e merkatos. Lewandowski, Kessie, Christensen dhe Raphinha janë gati për duelin e parë në kampionat ndaj Rayo Vallecano, teksa vetëm francezi Kounde nuk është federuar akoma.
Qendërmbrojtësi është i dëmtuar dhe do të jetë gati për Xavin në ditët e para të shtatorit. Drejtuesit katalanas pritet të largojnë De Jong, Braithwaite dhe njërin mes Depay e Aubameyang, për të mbushur arkat dhe për të mundësuar edhe federimin e “ish”-it të Sevillas.
Ndërkohë, Miralem Pjanic nuk lëviz nga “Camp Nou”. Kualiteti i boshnjakut nuk vihet në diskutim, ai ka punuar mirë gjatë kësaj periudhe përgatitore dhe Xavi është shumë i kënaqur me 32-vjeçarin.
“Pjanic më ka bindur, ai do të qëndrojë me në këtë sezon. Në mesfushë kemi Busquets, Pjanic, Kessie, De Jong, por edhe Sergio Roberton, i cili mund të luajë pa probleme në këtë repart”, theksoi Xavi në konferencën për shtypin.
Barcelona ndodhet në formë të mirë sportive. Entuziazmi është i madh te katalanasit, të cilët luajën takimin e parë të sezonit 2022/2023 në La Liga sonte (e shtunë) përballë Rayos së Ivan Balliut. Sfida fillon në orën 21:00 dhe do transmetohet në SuperSport 2.
TESTONI NJOHURITË TUAJA RRETH PREMIER LEAGUE
QUIZ/ Premier League 2021-2022 – Sa mirë e kujtoni sezonin që sapo u mbyll?