Reali i Madridit dhe Barcelona vihen sonte përballë në finalen e Superkupës së Spanjës. El Clasico, si gjithmonë pritet të na sjellë emocione magjike, teksa dy rivalët e përjetshëm do të matin forcat, këtë herë në Arabinë Saudite.
Real-Barça asnjëherë nuk mund të konsiderohet një sfidë dosido, pavarësisht rrethanave nga të cilat mund të vijnë skuadrat. Katalanasit janë kampionët në fuqi, ndërkohë që në anën tjetër “Los Blancos” kryesojnë La Ligan së bashku me Gironën, pas 19 javësh.
Skuadra e Ancelottit vjen në këtë përballje disi më e lodhur, për faktin se iu desh që të kalonte rivalët e qytetit, Atletikon e Simeones në mesjavë, vetëm pas kohës shtesë. Në një përballje të zjarrtë e shumë dramatike, që përfundoi 5-3.
Në anën tjetër, Barcelona kaloi Osasunën të enjten, e tashmë kërkon të tregojë dhëmbët ndaj “galaktikëve”. Të cilët në kampionat i shohin 7 pikë më sipër.
Lexo edhe:
- E bujshme, Manchester City hap shkollë futbolli në Shqipëri
- Zyrtare/ Roma mirëpret një tjetër shqiptar, sulmuesi një opsion plus për Mourinhon
- VIDEO/ Izolimi jep efekt, Rrahmani shënon në shtesë dhe rikthen Napolin te fitorja
- “Kujtojnë se jam Harry Potter”, Mourinho “shpërthen”: Nuk e kam luksin e Guardiolës
Në fillimin e sezonit, Reali arriti që të mundë 1-2 Barcelonën me përmbysje, falë të jashtëzakonshmit Jude Bellingham.
Sa u takon gjendjeve të skuadrave, Federico Valverde pritet të jetë i gatshëm për këtë përballje, ndërkohë që Ancelotti mund të bëjë disa ndryshime në formacion. Për t’i dhënë freski ekipit, veçanërisht mesfushës, pas 120 minutave ndaj Atleticos.
Në krahun tjetër, Raphinha është në dyshim për Barcelonën, pasi u detyrua të largohej në pjesën e parë kundër Osasunës. Pedri bëri rikthimin nga stoli dhe mund të ketë hapësira dhe ndaj Realit, ndërsa Joao Cancelo gjithashtu pretendon të marrë minuta.
Një Real Madrid –Barcelona është një duel për të cilën nuk mund të bësh parashikime. Aq më tepër kur në mes është dhe një trofe, teksa të gjithë do të kenë mundësinë për ta shijuar në ekranin e SuperSport 2 nga ora 20:00 e së dielës.
