Ironia dhe thumbimet ndaj eliminimit të Manchester City në gjysmëfinalet e Champions League kanë pushtuar rrjetet sociale, sidomos për mënyrën sesi erdhi disfata ndaj Real Madrid.
Djemtë e Pep Guardiolës po fitonin 0-1 në Madrid, por Rodrygo realizoi dy herë në limite për Realin, ndërsa Benzema vulosi suksesin e jashtëzakonshëm të ekipit spanjoll me penalltinë e saktë në minutat e para të kohës shtesë.
Tifozët e “Cityzens” duhet të presin ende për të shijuar trofeun e parë të Champions League, kompeticion të cilin skuadra nga Manchesteri nuk e ka fituar kurrë më parë në histori.
Spartaku i Moskës, klub që njihet për ironinë dhe sensin e humorit në rrjetet sociale, ka pëfituar të bëjë pak humor në Twitter në lidhje me klubin ishullor.
“Mund të konfirmojmë se kemi fituar të njëjtin numër Champions League si Manchester City”, lexohet në postimin e klubit rus, që rezultatin më të mirë në Champions e ka në vitin 1991 (gjysmëfinale).
