Juventusi turpërohet nga Villarreali në Torino e për rrjedhojë eliminohet që në fazën e 1/8-ave të Championsit. “Zonja e Vjetër”, e cila kishte barazuar në ndeshjen e parë në transfertë, jo vetëm që nuk fitoi, por u mposht thellë 0-3, duke u larguar me kokën ulur nga kompeticioni.
Bardhezinjtë u shpërfytyruan në minutat e fundit të ndeshjes, teksa golin e parë e pësuan në minutën e 78-të me 11-metërsh (Moreno), për të ardhur më pas te goli i dytë, i shënuar nga Torres. Në minutat shtesë mbrojtja e Juventusit shkaktoi sërish penallti, e shndërruar në gol nga Danjuma.
Avancon në çerekfinale edhe Chelsea, që iu imponua 1-2 në transfertë Lilles. Burak Yilmaz realizoi me 11-metërsh për vendësit në pjesën e parë, por blutë e Londrës përmbysën shifrat me golat e Pulisic në fundin e pjesës së parë dhe Aspilicuetas në të 71-tën.