Kombëtarja e Shqipërisë do të luajë ndeshjen e parë zyrtare për vitin 2023 në muajin mars, me brazilinian Sylvinho që do të debutojë si trajner i kuqezinjve. Tekniku ka nisur nga puna prej kohës, ndërsa një pjesë e lojtarëve të Shqipërisë po kalojnë momente të mira.
Sokol Cikalleshi shënoi dy gola në ndeshjen e javës së 16-të në Arabinë Saudite, duke i dhënë skuadrës së Al Khalej fitoren. Kavajasi shkon në kuotën e 5 golave në këtë edicion, por ky vit kalendarik ka nisur mjaft mirë për të. Në Danimarkë vijon të bëjë mirë Arbnor Muçolli, i cili gjeti rrugën e rrjetës për të katërtën herë këtë edicion.
23-vjeçari shënoi në suksesin 4-1 të Velje ndaj Fremad Amager, ndërsa u shpall dhe lojtari i ndeshjes. Titullar luajti dhe Myrto Uzuni në ligën e dytë spanjolle, por nuk arriti dot që të shënonte në takimin mes Granadës dhe Huesca.
Në Çeki, Qazim Laçi u bë protagonsit me një asist në suksesin e Sparta Prague ndaj Jablonec, me mesfushorin i cili shërbeu saktë për golin e tretë të skuadrës së tij, që kristalizoi dhe suksesin 3-0 këtë edicion. Ivan Balliu vijon të jetë një titullar i padiskutueshëm tek Rayo Vallecano, teksa ishte titullar dhe në ndeshjen e javës së 22-të të La Liga ndaj Sevilla-s, me ndeshjen që përfundoi në barazim 1-1.
Në Itali, Ardian Ismajli luajti për 90 minuta me Empolin në përballjen ndaj Fiorentinës, ndërkohë që 90 minuta ishte në fushë dhe Berat Gjimshiti ndaj Lecces me Atalantën e tij. Ndeshje e plotë dhe për Elseid Hysajn me Lazion, në fitoren 0-2 ndaj Salernitanes. Nedim Bajrami luajti vetëm 79 minuta me Sassuolon ndaj Napolit, ndërkohë që Frederik Veseli dhe Emanuele Ndoj sfiduan njëri-tjetrin në Serie B për 90 minuta të dy në ndeshjen Benevento – Brescia që u fitua nga vendasit me rezultatin 1-0.
Në kampionatin kroat, Lindon Selahit dhuroi një asist në fitoren e Rijekës ndaj Lokomotivës së Zagrebit me të cilën luante titullar Jon Mersinaj, ndërsa në pjesën e dytë u aktivizua dhe Indrit Tuci. Në Hungari, Honved mori fitoren 2-0 ndaj Debrecen, ndërsa ishin titullar Albi Doka dhe Herdi Prenga. Ndërkohë luajtën titullar dhe Ylber Ramadani në Skoci, Amir Abrashi në Zvicër.
