6 muaj jashtë, ndonjëherë fati është vërtet i pamëshirshëm. Dëmtim më i rëndë nga sa mendohej për Gjergji Muzakën, ai ndaj Luftëtarit. Ekzaminimet e fundit kanë evidentuar një këputje të ligamenteve në gjurin e majtë, është në fakt një nga ato dëmtime makthi për futbollistët apo atletët, kërkon të paktën 6 muaj kohë për rikuperimin. Ky sezon mund të konsiderohet praktikisht i mbyllur.
Skënderbeut dhe Ilir Dajës i duhet të bëjë për thuajse gjithë kampionatin pa të, pa një ndër lojtarët më të rëndësishëm, që ka klas dhe eksperiencë e që aq shumë i duhen një skuadre me dyndje të rinjsh në organikë.
Megjithatë, në të tilla raste, shumë më i rëndësishëm është fati i vetë futbollistit. Muzaka është 35 vjeç dhe një kohë kaq e gjatë jashtë fushë mund t’i shkaktojë natyrshëm edhe dyshimet në lidhje me vazhdimësinë e karrierës. Të apasionuarit pas futbollit pa diskutim që do të donin të shihnin sërish në fushë një nga lojtarët më elegantë, nuhatje, klas e inteligjencë që ka pasur kampionati në këto dy dekadat e fundit.
Muzakës i duhet të gjejë forcën për t’u ringritur. Nuk i mungon, e ka treguar pak vite më parë, kur te Tirana I thanë “i ka fikur motorët”, por ai u ringrit mbi gjithçka duke shkëlqyer te Skënderbeu.
