Ditën e hënë në orën 19:45, Dinamo do të zbresë në fushën e Air Albania për të luajtur derbin e dytë të sezonit ndaj Partizanit. Në fazën e parë kjo sfidë u mbyll në barazim 1-1, ndërsa këtë herë blutë do të provojnë të marrin pikët e plota, kjo edhe për t’u rikthyer te rezultatet pozitive duke qenë se dy ndeshjet e fundit kanë qenë zhgënjyese.
Por, trajneri Bledi Shkëmbi nuk do ta ketë të plotë organikën, teksa në këtë përballje ai që do të mungojë është Aleksandar Isaevski. Mbrojtësi i krahut të majtë u ndëshkua me karton të verdhë në sfidën ndaj Teutës dhe kështu plotësoi numrin katër të tyre.
Në këtë formë, futbollisti nga Maqedonia e Veriut është i padisponueshëm dhe nuk mund të kontribuojë për Dinamon në derbin ndaj Partizanit, teksa mund të rikthehet për ndeshjen pasardhëse ndaj Vllaznisë.
