Klubi i Teutës vijon përgatitjet për sfidën e të enjtes në mbrëmje përballë izraelitëve të Beitar Jeruzalem, përballje kjo e vlefshme për turin e parë eliminator të Ligës së Europës dhe që do të luhet në stadiumin “Niko Dovana”.
E ndërkohë që trajneri Edi Martini është i përqendruar te puna në fushë, drejtuesit po punojnë për t’i përforcuar organikën dhe sot kanë zyrtarizuar afrimin e mesfushorit brazilian Iran Gonçalves Junior.
Ky i fundit në sezonin e fundit ka qenë pjesë e Besës së Kavajës në Kategorinë e Parë dhe ka luajtur të gjithë takimet, duke shënuar 10 gola dhe asistuar 12 të tjerë, ndërsa që sot është vënë nën urdhrat e trajnerit Martini.
Pas përfundimit të sezonit, Teuta largoi futbollistët që nuk bënin pjesë në planet e trajnerit dhe aktualisht po punon për zëvendësimin e tyre me elementë cilësorë, ndërsa mesfushori 25-vjeçar është afrimi i tretë i kësaj periudhe të merkatos.