Ishte konfirmuar në zyrat e klubit, por tashmë ka ardhur edhe komunikata zyrtare e Tiranës, që ka vendosur t’i besojë pankinën trajnerit Ardian Mema edhe për sezonin e ardhshëm.
Nëpërmjet një postimi në faqen zyrtare në Facebook, klubi bardheblu ka njoftuar se ka nënshkruar kontratë një vjeçare me Ardian Memën dhe se tashmë do të nisë puna për të formuar ekipin për sezonin e ardhshëm.
Mema u ul në stolin e Tiranës në muajin tetor të vitit të kaluar, për të zënë vendin e brazilianit Ze Maria, ndërsa bardheblutë arritën të sigurojnë mbijetesën mes shumë vështirësish.
Megjithatë këtë sezon tekniku Mema do të ketë mundësi të formojë vetë skuadrën, ndërsa nga klubi bardheblu i është dhënë garancia për investime të mëdha në merkato.