Ardit Hoxhaj do të jetë përforcimi i parë i Vllaznisë për sezonin e ri futbollistik. Sulmuesi vlonjat, i cili sezonin që sapo u mbyll luajti me skuadrën e vendlindjes së tij, por pa mundur të bëjë shumë për të shmangur rënien nga Superiore, ka qenë i pranishëm në takimin e stafit të ri teknik të kuqebluve me futbollistët.
Madje këtë enjte ai ka zhvilluar seancën e parë stërvitore me kuqeblutë. Edhe pse ende nuk është zyrtarizuar kjo lëvizje, kuptohet që konsiderohet pjesë e skuadrës shkodrane, pasi ka arritur marrëveshjen për kushtet e kontratës.
Hoxhaj, fillimisht ka spikatur te skuadra e Bylisit në periudhën 2014-2016, më pas ka luajtur në Superiore me Skënderbeun, Korabin dhe Flamurtarin. Në sezonin e fundit me kuqezinjtë, ka mundur të shënojë 8 gola në 31 ndeshje të kampionatit.
