Me mbylljen e javës së 7-të mësohet edhe kalendari i raundit pasardhës në Kategorinë Superiore. E 8-ta luhet e gjitha në fundjavë, me 3 takime të shtunën dhe dy të dielën. Gjithcka nis me takimet e skuadrave të ngjitura këtë vit në kategorinë maksimale të futbollit shqiptar. Njëkohësisht, në orën 14.00 të së shtunës, luhen Laci – Kamza dhe Lushnja – Teuta. Përballje tejet interesante, me Lacin që do të kërkojë t’i japë më tepër vazhdimësi momentit pozitiv, pas fitores ndaj Luftëtarit, ndërsa Kamza do të synojë reagimin pas ndëshkimit vetëm në fundin e takimit përballë një kundërshtari me shumë cilësi si Flamurtari në Vlorë. Projektorët drejtohen nga Skënderbeu – Luftëtari, me korcarët që në rikthimin në shtëpi, në orën 17.00, do të përballen me skuadrën gjirokastrite, ku Hasan Lika synon surprizën pas debutimit me humbje ndaj Kukësit. E diela sjell në skenë dy takime akoma dhe më interesante. Pas mesdite, Kukësi përballet me trajnerin me të cilin arriti suksesin historik. Ernest Gjoka kthehet në “Zeqir Ymeri”, aty ku pak muaj më parë siguronte titullin kampion, tanimë në drejtimin e Vllaznisë, me objektivin për t’i shkaktuar një surprizë ndryshe Kukësit. Në orën 17.00, vëmendja e gjitha për Partizani – Flamurtari, me të kuqtë që vijnë pas 3 fitoreve radhazi, ndërsa Flamurtari, pasi është rikthyer te suksesi, vihet para një prove force në një përballje direkte për vendin e tretë në klasifikim.
E shtunë, 28 tetor
Laci-Kamza 14:00 SS3 SS3HD
Lushnja-Teuta 14:00 SS5 SS5HD
Skënderbeu-Luftëtari 17:00 SS3 SS3HD
E diel, 29 tetor
Kukësi-Vllaznia 14:00 SS3 SS3HD
Partizani-Flamurtari 17:00 SS3 SS3HD
