Në pritje të derbit të vërtetë në kampionat, Tirana e Dinamo matën forcat në një miqësore në qytetin e Pogradecit, aty ku skuadrat po kryejnë edhe fazën përgatitore para-sezonale.
Ndonëse vetëm një miqësore, sfida i ngjau shumë një derbi të vërtetë, pasi nuk mungoi grinta e lartë, tensioni e kartoni i kuq, por në fund ishin bardheblutë ata që fituan me rezultatin 2-0 falë golave të Taulant Seferit e Vesel Limajt.
Pjesa e parë ishte më e mirë për “nëndetësen blu”, teksa spikatën me performancën e tyre veterani Agim Ibraimi dhe talenti i ardhur nga Apolonia, Redon Mihana, ndërsa nuk mungoi as tensioni i zakonshëm i Michael Ngo’o, që nuk humbte asnjë rast për t’u konfrontuar me kundërshtarët.
Në minutën e 76’, mesfushori Lancinet Sidibe u ndëshkua me kartonin e dytë të verdhë dhe la Dinamon me 10 futbollistë, ndërsa Tirana shfrytëzoi më së miri epërsinë numerike për të zhbllokuar ndeshjen me Seferin e më pas dyfishuar rezultatin me një supergol të Vesel Limajt.