Vitet e fundit kanë qenë tepër të vështira për Flamurtarin dhe shumë të dhimbshme për tifozët vlonjatë. Një nga ekipet më popullore të futbollit shqiptar ra vjet në Kategorinë e Dytë.
Gjithsesi, kuqezinjtë kanë zhvilluar një sezon pozitiv dhe ditën e djeshme siguruan ngjitjen në të Parën, një divizion më lart. Kuqezinjtë fituan 4-1 ndaj A.F Luftëtarit falë golave të Bicit, Indio, Çelhakës dhe Diamantit.
Triumfi me “poker” ka ngjitur Flamurtarin në kuotën e 56 pikëve në grupin B dhe kalimin në Kategorinë e Parë. Në ekipin vlonjat luajnë emra si Ribaj, Moçka, Bici, Gocaj, Ramadani apo Pjeshka.
Një moment feste për tifozët, të cilët presin që skuadra e zemrës – fituese e një titulli, katër Kupave të Shqipërisë dhe dy Superkupave – të rikthehet sa më shpejt në elitën e futbollit shqiptar.