Një nga lëvizjet më të bujshme të merkatos së kaluar ishte edhe transferimi me parametër zero i Hakan Calhanoglu nga Milan te Inter. Turku, edhe pse duke njohur rivalitetin mes dy klubeve, nuk e pati problem t’i bashkohej pjesës tjetër të qytetit ndërsa së fundmi është shprehur se është i lumtur që tashmë është pjesë e zikaltërve. Fantazisti shton se e dinte forcën e Inter duke qenë se në shumë derbi kur ishte me fanellën e Milan, kishte dalë i mposhtur nga përballja me ta.
“E dija që Inter ishte një skuadër e fortë, kjo edhe sepse ata kanë fituar shumë derbi kundër Milanit ku isha unë. Fitonin shumë më shumë se kuqezinjtë dhe kështu mendova se Inter do të ishte një zgjedhje e shkëlqyer.
Unë Milanin e respektoj, kam një raport shumë të mirë me të gjithë personat në klub. Por, kisha nevojë për një sfidë të re dhe këtë vendim e mora së bashku me familjen. Jam i lumtur që tashmë jam te Inter, një klub i madh dhe që në sezonin e kaluar fitoi titullin”, u shpreh Calhanoglu.
