Rafael Nadal mposhti Darwin Blanch, 16-vjeçarin e talentuar amerikan, në dy sete të shpejta (6-1, 6-0) dhe u kualifikua në raundin e dytë të “Masters 1000” në Madrid, ku do të përballet me australianin Alex de Minaur.
Kampioni spanjoll po tenton të rifitojë formën fizike të ditëve të tij më të mira dhe tashmë testi i së shtunës mund të japë disa përgjigje për gjendjen e mëngjarashit.
37-vjeçari analizoi paraqitjen e tij në konferencën për shtypin pas ndeshjes, ku ndër të tjera tha: “Jam realist. U përballa me një lojtar me potencial të madh dhe që besoj se do të ketë një të ardhme të ndritur, por sot ai bëri shumë gabime.
Nuk e di si do të jetë pas disa javësh, por sot nuk është ende mjaftueshëm solid. Nuk do të vendos sot, nesër apo gjatë këtij turneu nëse do të luaj në Roland Garros. Do të shkoj në Paris vetëm nëse jam konkurrues.”
Lexo edhe:
- VIDEO/ Daku i papërmbajtshëm, pas golit vjen edhe asisti për të “blinduar” fitoren
- Ish-lojtari i kombëtares e mbyll për momentin me futbollin: Kam nevojë të pushoj!
- Man. United sërish pazar tek Interi, gati 60 mln Euro për 25-vjeçarin
- Al-Khelaifi: Laporta, kur do të heqësh dorë nga kjo idiotësi?!
Nadal foli edhe për ndeshjen e raundit tjetër në turneun spanjoll, ku theksoi se mezi pret sfidën kundër australianit Alex de Minaur:
“Në nivel personal dhe sportiv, fitorja apo humbja të shtunën nuk ka asnjë ndryshim për mua. Sot për mua ka gjëra shumë më të rëndësishme. Sigurisht që nuk aspiroj ta fitoj këtë turne.
E shtuna do të jetë një mundësi tjetër për të parë se si po luaj. Do të përpiqem të argëtohem, por nuk jam favoriti për të fituar. Tri javë më parë nuk e dija nëse do të kthehesha për të luajtur një ndeshje zyrtare, tani kam luajtur për dy javë rresht”, deklaroi Nadal.