Një gol i ishit Adel Taraabt në minutën e 70’, bëri që Milani të mposhtet me rezultatin minimal 1-0 dhe të regjistrojë humbjen e dytë në International Champions Cup, pas asaj me Bayernin pak ditë më parë.
Përballë portugezëve u shfaq një Milan mjaft i bukur, që krijoi një mori rastesh dhe arriti të godasë traversën me Biglian e shtyllën me Calhanoglu, përveç disa pritjeve vendimtare nga portieri i Benficës, përballë Piatek e Borinit.
Me protagonistë Biglian e Suson si fantazist, kuqezinjtë ishin mjaft të përqendruar në pjesën e parë dhe mund të kishin fituar me 3-4 gola epërsi, nëse do të ishin treguar më të saktë përpara portës.
Në 45-minutëshin e dytë Giampaolo bëri disa ndryshime, ku ndër të tjera aktivizoi edhe blerjen e re Krunic, por këtë herë Milani i tij ishte më pak kërkues dhe i zhdërvjelltë, duke mos rrezikuar seriozisht portën e portugezëve.
Këta të fundit arritën të shënojnë golin e fitores në minutën e 70’, kur pikërisht një ish i Milanit, si Adel Taraabt gjuajti nga distanca dhe topi gjeti devijimin vendimtar në këmbët e Biglias, para se të ndalej në rrjetën e portës së Pepe Reinës.
