Rezultati është “mbreti” i gjithçkaje. Kukësi arriti të siguronte për herë të parë në histori kalimin e një raundi në Champions League dhe e bëri duke mos impresionuar me lojë, por duke u shfaqur pragmatist në maksimumin e mundshëm.
Shorti i rezervoi maltezët e Vallettës por dueli i dyfishtë rezultoi shumë më i vështirë se sa parashikohej për veri-lindorët. Takimi i parë në Shkodër u mbyll në barazim pa gola dhe loja e Kukësit nuk ekzaltoi askënd, madje provokoi edhe debatin mes presidentit Gjici dhe ish trajnerit Pacult duke sjell divorcin me teknikun austriak.
Cungu u emërua menjëherë dhe ashtu si shkroi historinë 5 vite më parë, duke kaluar 3 ture në Europa League dhe bëri të njëjtën gjë duke qenë trajneri i parë i skuadrës blu që e kalon ekipin përtej një raundi në Champions. Natyrisht nuk është e thjesht për një skuadër që ka afruar 12 lojtarë të rinj të dhuroi menjëherë një lojë kompakte, megjithatë merita absolute për karakterin e treguar.
Të dominuar në shumë aspekte nga kundërshtari dhe në dizavantazhin e një goli, nuk është e thjeshtë të gjesh forcë për të reaguar, Kukësi arriti që edhe pse në buzë të greminës të shënonte golin që i dhuroi biletën për të shkuar më tej.
Përveç kënaqësisë për kualifikimin, të mirëpritura janë edhe 940 mijë eurot që do vijnë nga UEFA, megjithatë në raundin tjetër të gjithë në kampin kuksian e kanë të qartë që do të duhet një tjetër fytyrë, pasi vetëm karakteri dhe fati mund të mos mjaftojnë për të vijuar ëndrrën “Champions”.
