Egnatia e përuron me humbje stadiumin e ri të qytetit të Rrogozhinës. Në premierën e kampionatit, skuadra e drejtuar nga Gugash Magani, u dorëzua 1-3 ndaj Kukësit, duke mos përmbushur pritshmëritë e tifozëve vendës, të cilët kanë pritur plot 16 vite për ta parë sërish në elitë.
Pas një nisjeje të qetë të lojës ekuilibrat në rezultat u prishën në minutën e 22-të, kur Daci i verilindorëve shfrytëzoi një pasiguri të mbrojtjes dhe portierit duke dërguar topin në rrjetë.
Të njëjtit futbollist iu dha mundësia për të shënuar golin e dytë në minutën e 37-të, por shumë pranë portës goditi mbi tra.
Përvoja e Kukësi u reflektua me realizimin e golit të dytë nga Peposhi pak para përfundimit të pjesës së parë, me një aksion model me pasime të shumta dhe të sakta.
Edhe gjatë pjesës së dytë Kukësi e diktoi lojën dhe bëri futboll cilësor, madje goditi shtyllën me Taipin. Mirëpo golin e radhës e shënuan vendësit me autor Bruno Telushin, që goditi fort dhe saktë nga distanca, duke lënë në tension deri në fund Kukësin . Gjithsesi në fund Kukësi shënoi edhe një gol në minutën e katërt shtesë me Luka Milunovic, për ta nisur kampionatin me këmbën e mbarë. Nga ana tjetër Egnatia duhet të rregullojë shumë gjera në lojë, sidomos në fazën mbrojtëse.
