Prokuroria Federale në Itali ka përfunduar hetimin në lidhje me plus-valencat fiktive dhe ka dërguar çështjen në gjykatë, ku ka kërkuar gjobë për 11 klube, mes të cilëve edhe Juventus e Napoli, si dhe 61 drejtues të niveleve të ndryshme.
Bëhet fjalë për një proces hetimi për rritjen fiktive të vlerave të lojtarëve, në mënyrë që të rregullohet bilanci i këtyre klubeve, teksa prokuroria ka kërkuar 800 mijë euro gjobë për Juventusin dhe 329 mijë euro për Napolin.
Gjithashtu është kërkuar pezullimi 12 mujor nga detyrat, i presidentit të Juventusit, Andrea Agnelli dhe 11 muaj për atë të Napolit, Aurelio De Laurentiis, si dhe pezullim për shumë drejtues të tjerë.
Gjykata pritet të mblidhet më datat 14 dhe 15 maj, ku do të shprehet me një vendim, teksa për çështjen po heton paralelisht edhe Guardia di Finanza, e cila nuk ka dalë ende në konkluzion.