Ditët e fundit është lakuar shumë një kalim i Antonio Contes te Paris Saint Germain, për të marrë drejtimin e klubit, që duket se ka vendosur të ndërpresë kontratën me argjentinasin Maurizio Pochettino.
Megjithatë për t’u dhënë fund njëherë e mirë thashethemeve, ka menduar vetë tekniku italian i Tottenham, që ka thënë se gjithçka e shkruar është e pabazë dhe bëhet për të shpërqendruar klubin londinez në një moment vendimtar të sezonit.
“Nuk ka asgjë të vërtetë në ato që shkruhen për kalimin tim te PSG-ja. Janë lajme që bëhen për të shkaktuar shpërqendrim te ne, në një moment vendimtar të sezonit. Unë jam tërësisht i përqendruar te Tottenham dhe nuk mendoj për asgjë tjetër. Duam të arrimë objektivat tanë për këtë sezon dhe më pas të planifikojmë sezonin e ardhshëm”, tha Conte.
