Vllaznia e nisi me një humbje 3-1 aventurën europiane në raundin e parë të Conference League në Irlandën e Veriut përballë Linfiled. Edhe pse një rezultat i vështirë për t’u përmbysur, ai gol i Marko Juric në fundin e ndeshjes jep shpresë për shkodranët e trajnerit Migen Memelli.
Atmosfera pritet të jetë e zjarrtë të enjten mbrëma në Loro Boriçi dhe këtë e di fare mirë edhe trajneri i Linfield, David Healy. Ky i fundit shprehet se e ka paralajmëruar skuadrën për atë që e pret në Shqipëri ndërsa tregon se e ka vizituar më parë vendin tonë me kombëtaren e Irlandës së Veriut dhe se nuk ruan një kujtim të bukur, edhe pse bëhet fjalë për një ndeshje miqësore.
“Ajo që na pret është një klimë e nxehtë, armiqësore dhe e ethshme. Kam qenë disa herë në Shqipëri dhe nga eksperiencat e kaluara nuk është një vend i këndshëm për të luajtur futboll. Vllaznia kishte disa qindra fansa në Belfast dhe krijuan atmosferë, por në Shkodër do të jetë një atmosferë e 100-fishuar. Megjithatë, duhet të jemi të fokusuar te vetja jonë, të tregohemi profesionistë brenda dhe jashtë fushe. Kemi punë për të bërë.
Lexo edhe:
- Champions League “zbarkon” në Ohër, Struga gati për të shkruar historinë ndaj Zalgiris
- VIDEO/ Messi prezantim madhështor te Inter Miami, Beckham nuk e mbajnë këmbët: Dua të fitoj!
- “Nuk kthehem në Europë, aty vlen vetëm Premier League”, CR7 “thumbon” Messin për kalimin në MLS
- Kampion Europe me Italinë, futbollisti me orgjinë shqiptare: Stop krahasimeve me Del Pieron, kam një ëndërr
E mbaj mend kur luajtëm në Shqipëri me Irlandën e Veriut, ndeshja u luajt në stadiumin kombëtar në Tiranë. Ekipit vendas i takon të kujdeset për topat, konat gjithçka duhet për një stërvitje para ndeshjes. Por, kur shkuam në stadium një orë para ndeshjes nuk kishte asgjë. Nuk kishte topa, dhe bëhej fjalë për thjesht një ndeshje miqësore.
Shpresoj që Vllaznia të mos jetë kështu dhe të na kthej të njëjtën pritje siç iu bëmë ne. E di që do të jetë një udhëtim sfidues dhe i kam paralajmëruar lojtarët për çdo lloj provokimi. Shpresoj që falë etikës së punës të kalojmë në raundin tjetër”, u shpreh Healy.
Kujtojmë se ndeshjen mes Vllaznisë dhe Linfield të vlefshëm për raundin e parë eliminator të Conference League do të mund ta ndiqni ekskluzivisht të enjten në SuperSport 2 duke nisur nga ora 20:45.
